Si pulat, traktorët dhe fasulet u bënë loja më e madhe në rrjet

Loja e famshme Facebook që ka rekrutuar nga punonjësit e zyrave e deri tek shtëpiaket

Luleshtrydhet më janë vyshkur. I mbolla sot në mëngjes pasi arrita të blej farat me çmim të ulur prej 10 monedhash dhe pasi u sigurova se janë mbjellje me përfitim. Por dita iku pa u ndjerë, kisha punë për të bërë, drekë për të ngrënë, postë elektronike për të lexuar dhe kur u ktheva për të kontrolluar ngastrën time pashë se frutat kishin lulëzuar, ishin pjekur dhe ishin tharë për pak orë. Kjo nuk është bota reale dhe këto nuk janë luleshtrydhe mutantë; në fakt ato nuk ishin aspak luleshtrydhe. Bëhet fjalë për FarmVille, një lojë në Facebook, për të cilën kam punuar tokë dixhitale gjithë javën. Mbase ju vetëm keni dëgjuar për Farmville në njoftimet që ju vijnë në Facebook, ku thuhet se kush mbolli arën e 15-të të fasuleve, apo ndërtoi stallën e parë, apo fitoi një kordele me ngjyrë si njohje e arritjeve virtuale bujqësore. Mbase jeni bashkuar me një prej grupeve në Facebook që janë krijuar si protestë ndaj përhapjes së kësaj loje. Por protesta juaj do tretet në ajër: Famville është kthyer tashmë në lojën më të madhe sociale dhe ka rreth 80 milionë përdorures, çka i bie rreth 20 përqind e përdoruesve të Facebook-ut. Rreth 30 milionë prej tyre kujdesen për të mbjellat çdo ditë. Kur ky aplikim i lejoi përdoruesit të shkëmbejnë dhurata për Shën Valentin, 220 milionë të tilla u shkëmbyen për 18 orë, ndaj mund të imagjinohet vlera e kësaj loje. Objekti i Farmvillë është të ndërtoni dhe mbani fermën tuaj virtuale, të paguani monedha virtuale për farat, të mbillni bimë virtuale dhe të korrni fryte virtuale. Dhe siç vazhdon loja, lojtarët mund të fitojnë mjaft sa për të blerë traktorë dhe gjë të gjallë, të ndërtojnë ngrehina anekse dhe të zgjerojnë fermën e tyre përtej kufijve. Çelësi i suksesit është social: Nëse një lojtar i bind të njohurit në Facebook që të bëhen “fqinjët” e tij në Farmville ata mund të shpërblehen për plehërimin e arave të miqve dhe ushqyerjen e derrave të tyre.

Dikur, loja në rrjet ishte thjesht për njerëzit asocialë në dhoma të errëta që studionin guida strategjish për lojëra lufte si “World of Warcraft” dhe “Halo”. Tani, falë Farmville dhe lojërave të tjera si kjo, kjo demografi është zhvendosur në mënyrë dramatike drejt rrjedhës së përgjithshme duke përfshirë punonjësit e zyrave, nënat shtëpiake, fëmijët dhe gjyshërit e tyre. Një sondazh i kohëve të fundit arriti në përfundimit se lojtari mesatar i ditëve të sotme është një grua 43-vjeçare. Ajo që është e rëndësishme për lojtarët është se Farmville është falas dhe mund të shijohet një marrëdhënie e frytshme me lojën pa shpenzuar asnjë qindarkë. Çelësi kyç për krijuesit është se ka dhe një zgjedhje të dytë: Në lojë mund të përdoren para reale për të blerë të mira virtuale dhe për të qenë para miqve në renditjet në Farmville. Shumë prej këtyre produkteve virtuale janë me çmim të arsyeshëm dhe ndër dhuratat e Shën Valentinit ishte dhe një “unazë diamanti” 50-dollarëshe që mbron të korrat e marrësit nga tharja. Forca e lojërave në rrjet u bë e dukshme në vitin 2007 me rritjen dhe rënien spektakolare të “Scrabulous”, një lojë e famshme në Facebook që imitonte lojën “Scrabble”. Fillimisht, kjo lojë tërhoqi rreth gjysmë milionë përdorues në ditë. Facebook e hapi faqen  tij për krijuesit e jashtëm po atë vit, duke lejuar këdo me programin e nevojshëm për të krijuar lojëra, shërbime dhe aplikime të tjera për llogari të përdoruesve. FarmVille varet në ekzistencën e Facebook-ut dhe pa rrjetin social suksesi i saj do kishte qenë i pamundur. Në Farmville lojtarët shqetësohen për gjëra të thjeshta. Maja, për shembull, nuk është dakord me qëndrimin e fqinjëve të saj ndaj bujqësisë; veçanërisht me stilin e fermerëve që sakrifikojnë integritetin e tyre në favor të përfitimeve të lehta. Kasandra ndërkohë, shqetësohet për mirëqenien e kafshëve në Farmville. “Disa prej fermave të fqinjëve të mi janë të tmerrshme. Ia kanë lënë gjithë vendin bimëve dhe kuajt e lopët i kanë futur në një qoshe, ku s’kanë nga të lëvizin”, thotë ajo. Sipas saj, loja duhet të strukturoret në mënyrë që të jetë më miqësore më kafshët dhe ata që mbajnë shumë pulari të ndëshkohen.

Botë paralele: Lojërat më të famshme në rrjet

“World of Warcraft”

“WoW” është nëna e gjithë lojërave në rrjet dhe më shumë se 11.5 milionë janë thithur nga bota e Warcraft që prej krijimit të saj në vitin 2004. Përdoruesit e lojës paguajnë abonimin për privilegjin e të qenit kalorës shpatarë të mbretërive dixhitale. Pas zgjedhjes së avatarit karakter për të kontrolluar personazhin, ata e nden në një botë fantazie karrocash, orkash dhe përbindëshash të ndryshëm duke folur për pushtimet dhe ndërverpruar me lojtarët e tjerë. E nëse vdesin rrugës, ata kanë mundësinë e ringjalljes.

“Scrabulous”

Ky version në rrjet i “Scrabble” mori jetë në Indi në vitin 2005 nga vëllezërit Agarwalla. Kur Facebook-u hapi platformën për sipërmarrësit e palës së tretë në vitin 2007, rrjeti i të dashuruarve pas “Scrabulous” arriti në 500 mijë përdorues në ditë, me më shumë 800 mijë persona që e shtuan lojën në llogarinë e tyre në Facebook. Pasi Hasbro (që zotëron të drejtat e Scrabble në Amerikën e Veriut) dhe Mattel (që zotëron të drejtat e lojës në pjesën tejtër të botës” vunë re suksesin e lojës ata u përpoqën ta blinin “Scrabulous” e më pas ndërmorën veprime ligjore për ta mbyllur.  

“Second Life

Bota virtuale në Second Life (Jeta e dytë) nuk është teknikisht një lojë. Ajo ka të njëjtën influencë si Farmville, por jo me qëllime konkurruese. 18 milionë banorët e saj dalin për Pazar, dalin me miqtë, punojnë, bëjnë tregti dhe madje përfshihen në lidhje romantike. Pak a shumë si jeta reale, por pa pasojat e saj. Kjo botë virtuale ka dhe valutën e saj që quhet Linden Dollar. Vitin e kaluar u bë e ditur se falë aftësive tregtare në rrjet një sërë anëtarësh të lojës u bënë milionerë të kësaj bote virtuale. Bota virtuale u krijua nga sipërmarrësi kalifornian, Philip Rosedale.

“Pet Society”

Pet Society është krijuar nga rivali më i afërt i Zynga-s, Playfish. Kjo lojë është njësoj si Farmville dhe luhet nëpërmjet Facebook-ut dhe i lejon përdoruesit që të mbajnë një numër kafshësh. Ato mund t’i bindin kafshët e tyre të socializohen me ato të fqinjëve dhe të fitojnë pikë nga kjo. Ashtu si në tregun real të kafshëve, ai virtual u ofron një sërë produktesh përdoruesve që të zgjedhin që nga ushqimet e duhura, lëndinat për të kullotur e madje edhe vaska me hidromasazh. Edhe pse ka rreth 19 milion përdorues Pet Society nuk është në 10 lojërat më të famshme të Facebook-ut.

“MyToën”

MyToën është përshkruar si “loja Monopoly e botës rale”. Ky është një aplikacion i iPhone që ndërthur botën dixhitale me atë të jashtmen, pra të vërtetën dhe funksionon sipas të njëjtës linjë të rrjetit social FourSquare, i cili i lejon përdoruesit të regjistrohen në lokalitete të ndryshme gjeografike. MyToën, nga ana tjetër u lejon të blini dhe të menaxhoni versone virtuale të lokaleve tuaja të preferuara. Është krijuar nga kompania Booyah dhe tashmë loja ka më shumë se 800 mijë përdorues.



Burimi: TiranaObserver